Vínbúðirnar hafa með markvissum hætti undanfarin ár hvatt viðskiptavini til að huga að umhverfinu og nýta sér fjölnota burðarpoka. Í ár voru seldir 252 þúsund pokar sem þýðir að tæplega 5% viðskiptavina keyptu fjölnota burðarpoka. Vínbúðirnar halda áfram að hvetja viðskiptavini til að hugsa um umhverfið og hafa fjölnota burðarpoka meðferðis frekar en að safna þeim í skúffur og skápa heimilanna.

Árlega er öllum Vínbúðum sett mælanleg markmið meðal annars um skilríkjaeftirlit, ánægju með þjónustu, viðmót starfsfólks, rýrnun og gæðaeftirlit.

Vínbúðunum er skipt í þrjá flokka eftir fjölda tegunda í vöruvali: stærri, milli stórar og minni Vínbúðir. Alls eru 16 Vínbúðir í flokki þeirra stærri, 13 í milli stærð og 21 í flokki minnstu Vínbúða. Niðurstöður mælinganna eru birtar mánaðarlega og eru öllum stjórnendum Vínbúða aðgengilegar.

Árlega er starfsfólki þeirra Vínbúða sem bestum árangri ná veitt viðurkenning. Að þessu sinni var Vínbúðin Reykjanesbæ valin Vínbúð ársins í flokki stærri Vínbúða, Vínbúðin Flúðum í flokki milli stórra Vínbúða og Vínbúðin Hellu í flokki minni Vínbúða. Auk þess voru veitt tvenn hvatningarverðlaun. Vínbúðin Akureyri fékk viðurkenningu fyrir háa einkunn í mælingu á viðmóti starfsfólks í þjónustukönnun, þar sem 96% viðskiptavina töldu viðmót starfsfólks vera mjög eða frekar gott. Vínbúðin Ólafsvík fékk einnig viðurkenningu fyrir að vera með hæstu einkunn í þremur af fjórum þáttum í þjónustukönnun Vínbúðanna.

Samstarfið hefur aukist jafnt og þétt undanfarin ár og aukin áhersla verið lögð á siðferðilegar grundvallarreglur í aðfangakeðjunni, auk umhverfis- og loftslagsmála. Í samvinnu við hagsmunaaðila er áhersla á að bera kennsl á og bregðast sameiginlega við mikilvægum áhættum sem eru til staðar í aðfangakeðjunni. Mögulegar mikilvægar áhættur eru meðal annars, vinnuvernd, félagafrelsi og réttur til kjarasamninga, mismunun, nauðungarvinna og mansal, mannsæmandi laun og vinnutími.

Allar einkasölurnar eru meðlimir í alþjóðasamtökunum amfori, en markmið þeirra er að tryggja aukna samfélagsábyrgð í aðfangakeðjunni. Í samstarfi við amfori hafa einkasölurnar í Finnlandi, Noregi og Svíþjóð gert fjölda úttekta í samstarfi við alþjóðlega úttektaraðila. Úttektirnar felast í því að meta framleiðendur og/eða ræktendur á grundvelli siðareglnanna og gera áætlun til úrbóta í samvinnu við hagsmunaaðila, ef þörf er á.

Vöruval Vínbúðanna byggir á reglugerð um vöruval, innkaup og dreifingu ÁTVR á áfengi (nr.1106/2015) með síðari breytingum. Eftirspurn viðskiptavina ræður í grunninn mestu um vöruval Vínbúðanna. Vöruvalið skiptist í þrjá megin söluflokka: kjarna, reynslu og sérflokk. Auk þeirra eru smærri tímabundnir flokkar sem tengjast almennt tímabilum eða árstíðum, svo sem þorra, páskum, sumri og jólum. Kjarni er megin söluflokkurinn og myndar grunn að vöruvali hverrar Vínbúðar.

Kjarni er megin söluflokkurinn og myndar grunn að vöruvali hverrar Vínbúðar. Vöruval í kjarna er endurmetið þrisvar á ári.

Reynsluflokkur er ætlaður nýjum vörum og fær dreifingu í fjórar Vínbúðir við upphaf sölu. Ef reynsluvara nær tilteknu söluviðmiði færist hún í kjarna og fær um leið dreifingu í fleiri Vínbúðir.

Sérflokki er ætlað að bjóða vöruúrval sem byggir á fjölbreytni og gæðum til að mæta væntingum viðskiptavina.

Vínbúðum er skipt í stærðarflokkana K1 – K9 eftir fjölda vörutegunda í vöruvali Vínbúðarinnar. Í minnsta flokknum, K1, eru að lágmarki 100 vörur í grunnvöruvali en í þeim stærsta, K9, eru að lágmarki 1.500 vörur. Vöruval minnstu Vínbúðanna er þó nær því að vera 200 vörur í heildina. Í Vínbúðinni Heiðrúnu er hægt að nálgast allar vörur í vöruvali, sem eru rúmlega 3300. Í Heiðrúnu hefur verið komið fyrir sérstöku svæði fyrir léttvín í hærri gæðaflokkum. Viðskiptavinir nýta sér einnig að panta vörur í vefbúð og fá þær afhentar í Vínbúð, sækja í afgreiðslu dreifingarmiðstöðvar á Stuðlahálsi eða á völdum afhendingarstöðum.

Þegar litið er á hlutdeild Vínbúða í heildarsölu þá hafa K1 - K5 Vínbúðir, vefbúð og veisluvín um 22% hlutdeild af heildarsölu Vínbúða. Ef hins vegar er horft til fjölda Vínbúða þá eru 35 af 51 Vínbúð í K1 – K5, eða 69%.*

Eftirspurn neytenda eftir vörum sem framleiddar eru með virðingu fyrir vernd umhverfisins og áherslu á mannréttindi hefur aukist á undanförnum árum. ÁTVR hefur sett sér markmið þar sem leitast er við að bjóða vörur sem framleiddar eru í sátt við samfélag og umhverfi og að fræða viðskiptavini um slíkar vörur. Stefnt er að því að flokka vörur undir yfirheitið sjálfbært val. Í þessu sambandi er sjálfbært val yfirheiti vörutegunda sem hlotið hafa almennt viðurkennda vottun um að framleiðsla þeirra sé lífræn, sjálfbær (e. sustainable), bíódínamísk eða sanngjörn. Tekið er mið af sérfræðivinnu norrænu einkasalanna, þ.e. Alko, ÁTVR, Systembolaget og Vinmonopolet þegar ákvarðað er hvort vottun sé almennt viðurkennd eður ei.

Vörugæði og neysluöryggi eru meginstoðir í ábyrgri starfsemi ÁTVR. Fjöldi skilaðra eininga á árinu voru 2.727 sem er 10% lækkun á milli ára. Flest vöruskil má rekja til korkskemmda. Af hverjum 100 þúsund seldum einingum voru um fimm skilað. Fjöldi innkallana á árinu voru 23. Helstu orsakir voru frávik í gæðum.